Eth passat 5 de mai de 2017, eth Conselh Generau d'Aran e era Generalitat de Catalunya autregèren ena Glèisa de St. Miquèu de Vielha, eth 4au Prèmi Robèrt Lafont ara Fondacion Privada Musèu Etnologic dera Val d'Aran peth sòn trabalh en defensa, projeccion e promocion dera lengua occitana.
Era Fondacion Privada Musèu Etnologic dera Val d'Aran se creèc en an 1973 damb er objectiu de promòir e deféner era cultura e lengua aranesa. Pendent aguesti 44 ans de trabalh es sues activitats mès remercables an estat: era d’impulsora des prumèrs concorsi literaris en aranés, era participacion ena creacion deth Musèu dera Val d'Aran, era organizacion dera corsa “Aran per sa Lengua”, era publicación annau dera revista Tèrra Aranesa, entre d’autes.
Er acte compdèc damb es intervencions deth Vicesindic Luis Carlos Medina, eth quau felicitèc ara Fondacion peth sòn trabalh e implicacion ath long de tot aguest temps ena defensa dera lengua e cultura aranesa, coma patrimòni de toti es aranesi. Atau coma tanben era directora generau de politica lingüistica Esther Franquesa, que destaquèc era implicacion dera Generalitat de Calalunya peth sòn supòrt e defensa dera lengua occitana.
Acte seguit, era directora generau de politica lingüística liurèc eth prèmi ara presidenta dera Fondacion Privada Musèu Etnologic dera Val d'Aran, Ròsa Maria Salgueiro, qu’arregraïc a totes es persones qu’an collaborat damb era Fondacion, atau coma tanben a toti es Presidents dera Fondacion
